సువర్ణ సుమన సుజ్ఞేయము - 711 (కవిసమ్రాట్ విశ్వనాథ సత్యనారాయణ: భగవంతుని మీది పగ: పురాణవైర గ్రంథమాల:1)

కొందరు తమకు తామే యెంతో గొప్పవార మనుకొనుచుందురు. తరచుగా మందప్రతిభులతో  కలసికొనుచుందురు.  ఆ మందప్రతిభులు వారిని కొండ కెత్తుచుందురు. వారు తాము కొండ యెత్తున్నామని యనుకొనుచుందురు. ఈ దృశాల్ప ప్రతిభావంతులకు మహాపురుషు లుందురని తెలియదు. తమకంటె పండితు లుందురని తెలియదు. తమ వద్దకు వచ్చిన ప్రతివారును తమ్ము గౌరవించవలయు ననియే వారి యుద్దేశము, ఆ గౌరవముపొందుటకే తాము జన్మించితిమని వారి యుద్దేశము.  అట్టి లక్షణమునకు తెలుగుభాషలో నొక మాట యున్నది. అది సంస్కృతపు మాటయో, తెలుగు మాటయో తెలియదు. ధార్ష్ట్య మన్న మాట పై చెప్పిన సర్వలక్షణములు లో నిముడ్చుకొని యందున్న యర్థమీయదని యాంధ్రజాతి దానికి " ధార్ష్టీక " మని పేరు పెట్టెను. ఈ ధార్ష్టీకమున కొక లక్షణ మున్నది. ఎదుటివారి ప్రతిభను తెలిసికొని కూడ దానిని మన్నించదు. ఆతలివాని ప్రతిభను నొక్కొక్కప్పుడు తెలిసికొనగలదు. తన యనుయాయులతో నది ప్రతిభ కాదనియే చెప్పుచుండును. ఇది యొక మ్లేచ్ఛ భావము. అనగా ధర్మేతరమయిన భావము.

- కవిసమ్రాట్ విశ్వనాథ సత్యనారాయణ: భగవంతుని మీది పగ: పురాణవైర గ్రంథమాల:1)