సువర్ణ సుమన సుజ్ఞేయము - 709 (కవిసమ్రాట్ విశ్వనాథ సత్యనారాయణ: భగవంతుని మీది పగ: పురాణవైర గ్రంథమాల:1

ఒక్కొక్క విద్యయం దొక్కొక్క యహంకార లక్షణము సన్నిహితమై యుండును. గదావిద్య యందొక మోటుతన ముండును. ఆ విద్య యందు ప్రవీణులయినవారు మదించిన గజముల వలె ప్రవర్తింతురు.  వారికి వెనుక ముందు లేదు. కొండలను కూడ పిండి కొట్ట కలుగుదుమనుకొందురు.  మదపుటేనుగు తామరకొలనులో ప్రవేశించినట్లే శత్రువును సం హరింపగలుగుదురు. సం హరింపలేరు - ప్రవృత్తి మాత్రము మదగజ ప్రవృత్తి.  ఇది గదాయుద్ధాశ్రయమయిన లక్షణము. ధనుర్విద్య యున్నది. అది నేర్చినవాని యందు తొందరపాటుండదు. గదావిద్యా ప్రవీణుడు తాను శత్రువుల కడకు పోవును. ధనుర్విద్యా ప్రవీణుని కడకు శత్రువులు రావలయును.  గదావిద్యా ప్రవీణుడు శత్రువుల మీదికి దూకును. ధనుర్విద్యానిపుణుడు శత్రువులను తన యమ్ము యొక్క లక్ష్యపు మేరకు రా నెదురుచూచును. గదావిద్యానిపుణుని ప్రకృతి  మత్తగజ ప్రకృతి యైనచో ధనుర్విద్యానిపుణుని ప్రకృతి పొంచియున్న పెద్దపులి లక్షణము.  ఖడ్గవిద్యానిపుణుని పద్ధతి వీరికంటె వేఱయినది.  వాడు త్రాచుపాము వంటివాడు. ఒక లిప్తలో కాటువేయును. నిముసములో తోక మీద నిలుచుండును.  అమిత వేగ ప్రకృతి. కాటు వేసిన తరువాత నిస్సార పడిపోవును.  ఆ యా విద్యల యందలి నైపుణ్యము తద్విద్యాగతములైన యీ లక్షణముల చేత కాలక్రమమున తద్విద్యానిపుణుని యందు నాయా లక్షణములను పాదుకొలుపును.  త్రాచుపామున కనవసరముగా కోపము వచ్చును. దానికి తాకిడి తగిలినచో బుస్సుమని లేచును.  ఈ తాకిడి యొక్క స్వరూప మేమని విచారణ లేదు. తాను దేనిని కఱువబోవుచున్నదో  తెలియదు.  ప్రక్కనున్నది శిలాఖండము గావచ్చును. వెంటనే కాటువేయును. దాని విషాగ్నికి శిలాఖండము బ్రద్దలు కావచ్చును.  దీని కోఱలు విఱిగిపోవచ్చును. ప్రకృతి దురతిక్రమణీయమయినది. అభ్యాసవశము చేత ప్రకృతి కానిది కూడ ప్రకృతిగా మాఱును.

- కవిసమ్రాట్ విశ్వనాథ సత్యనారాయణ: భగవంతుని మీది పగ: పురాణవైర గ్రంథమాల:1